وعد الأبد

سكان غرفتي 

انا منى وحكايتي بدئت من عند جدتي، كنت عايشة م اهلي ببيت عيلة كبير، يعني بيت جدي … جدي الي كان شخص هادي وقليل الكلام عكس جدتي .. الي كانت ست عصبية وصعبة وكانت ديناً بتحصل مشاكل بينها وبين جدي على اتفه الامور مع العلم انهم ورغم سنهم الكبير الا انك ساعات تحسهم زي المخطوبين بالضبط، يعني بيقعدوا بيتغزلوا ببعض ولا كأنهم عرسان جداد، وفيوم حصلت بينهم مشكلة وجدتي زعلت على جدي ودعت عليه بالموت، ومفيش غير ساعات قليلة دخلنا على جدي اوضته لقيناه قاطع النفس ومش بيتحرك … وبعد ما نقلناه للمستشفى للاسف عرفنه انه مات بسبب سكتة دماغية حادة، ومن يومها وجدتي مخها لسع او حرفياً اتلبست، كانت الصدمة شديدة عليها واحساسها بالذنب كان معذبها، هي مقدرتش تتخلص من فكرة انها السبب بموت جدي، وفضلت حزينة في اوضتها ومبتخرجش منها خالص، كنا بنسمعها ساعات بتكلم نفسها او زي ما تكون بتكلم جدي، وغالباً كان جدي بيرد عليها !"

عمري ما هنسى لما انا واختي قربنا من باب الاوضة بتاعت جدتي حطينا ودننا على الباب واحنا بنحاول نسمعها بتقول ايه، هنا سمعنا صوت عمرنا ما توقنعنا نسمعه بحياتنا، احنا بيومها سمعنا صوت جدي وهو بيقولنا بعصبيه ؟

_امشي من هنا يبنت منك ليها، امشو من عند الباب والا هخرج اوريكم الي عمركم ما شفتوه مني، امشو بسرعة "

بعد الي سمعناه دا احنا اترعبنا، وقتها كان عندي يا دوب 14 سنة واختي كان عندها 12 سنة، يعني مكناش صغيرين اوي عشان نحط فرضية ان الي حصل دا ممكن يكون خيال اطفال.. بعد الموقف دا انا واختي رحنا وحكينا الموضوع كله لماما، وهي طلبت مننا اننا منقربش تاني من اوضة جدتي ولا نحاول نبص عليها ولو بصة وحدة، بس فضولي وقتها كان اقوى من تحذيرات امي، انا فضلت اراقب جدتي، وكان عندي يقين انها كانت ملاحظة دا، ورغم كده مبطلتش اراقبها ... وفمرة انا دخلتلها الاكل لحد اوضتها وقعدت ابص عليها وهي بتأكل .. بالاثناء دي انا كنت مركزة معاها جداً، شفت ان طريقة اكلها كانت غريبة كانت عمالة بتأكل بنهم شديد وكأنها مأكلتش حاجة من شهور… المهم بعد ما جدتي خلصت اكلها بصتلي بنظرة مقبضة وغير مفهومة وقالتلي بنبرة وصوت اكاد اجزم انه مكنتش صوتها خالص قالتلي ؟

_انتي مبسوطة انك قاعدة معاية مش كدة، تعرفي ان انا كمان مبسوط بشوفتك، وهنبسط اكتر لو بقيتي اقرب من كدة .."

بيومها كلام جدتي خوفني خاصة انها تكلمت معاية بصيغة رجل، الفكرة لوحدها كانت كفيلة انها تخليني اقوم اهرب من اوضتها ومفكرش ادخلها تاني ابداً، وعدا وقت والامور فضلت على حالها يعني جدتي مكنتش بتخرج الا نادراً، وبيوم جدتي دخلت تستحمى وبسبب ضعفها وكبر سنها امي كانت ساعات بتدخل تحميها، وفالمرة دي امي بعد ما حممت جدتي ودخلتها الاوضة .... دخلت المطبخ وهي بعيط ! ، هنا سالتها ؟

_ايه مالك يا ماما انتي كويسة، ولا ليكون عفريت جدتي ضايقك "

ماما بصتلي بنظرة غريبة وقالت ؟

_ملكيش دعوة يا منى بطلي تتدخلي بحجات اكبر من سنك انا كويسة كنت بعيط بسبب وجع ظهري !"

كنت متأكدة ان ماما بتكذب، وفضلت وراها لحدما عرفت سبب عياطها ودا بعد ما كلمت عمتي على الموبايل وهي بتقولها ؟

_انا يختي اتخضيت اول ما شفت جسمها، انتي مش متخيلة كمية البقع والكدمات الي بكل حتة فيها تحسي كأنه في حد ضربها بقوة بعنف، يعني امك شكلها بتتعذب كل ليلة، والعياط الي كنا بنسمعه مش عياط حزن دي اكيد بتتألم، انا برأي اقول لأخوكي اول ما يرجع انه يعرضها على شيخ، يمكن الشيخ دا يعرف يخرجها من الحالة الي هيه فيها وكمان يصرف عنها اي ضرر او اذى "

امي انهت المكالمة واكيد المقصودة بكلامها جدتي، ودليل كلامي انه تاني يوم ابوية دخل علينا وفي ايده شيخ "

اول ما الشيخ دخل سمعنا صوت جدتي جاي من نحية الاوضة جدتي كانت بتعيط بصوت عالي وبتتألم، والدي وعمي دخلوا طلعوها من الاوضة وهي بتتعرعش وكأنها رايحة تتعدم مش تتعالج، بيومها الشيخ فضل يقرأ عليها كتير لحدما نامت، هنا الشيخ قالنا ان الي عليها انصرف او خرج لكنه خروج مؤقت، وان الجن دا من النوع الطيار هو مش قوي لكنه مراوغ يعني بيقدر يخرج من جسد ويخش بالتاني منغير ما يبذل اي مجهود، يعني لازم جدتي تفضل متحصنة وطاهرة عشان ميقدرش يقربلها تاني، وحصل وجدتي شبه تعافت وبدئت تخرج من اوضتها وتتكلم معانا واستمر دا اسبوع وحد وبس بعد الاسبوع دا ابتدت الكوارث تحصل من تاني، وبشكل اسوء جدتي رجعت انتكست من تاني واصبحت اسوء مما كانت عليه، جدتي بدئت تدخل بحالة الا وعي بدئت تعمل حجات غير طبيعة، من الحجات دي كانت لما تشوف طفل معدي من جنبها تمسكه وتفضل تخنق فيه بعنف وما بنعرفش نخصله منها الا بالعافية !"

دا خلانا وللأسف نحبسها في الاوضة، وساعات نربطها عشان ما تأذيش نفسها او تؤذي حد تاني، وبعد سنة من المعاناة جدتي للاسف توفت، لما ماتت احنا زعلنا عليها وتأثرنا بموتها… كان يوم من اسوء ايام حياتي، صح مكناش نكلمها كتير لكننا كنا متعودين على وجودها، بعد موتها اوضتها اتقفلت، ومحدش فكر يفتحها فضلت مقفولة يجي خمس شهور، امي كانت بتفتحها كل شهر تنظفها وبعدين تقفلها تاني عدت سنة ونص بالضبط والاوضة على وضعها لغاية ما انا قررت اني اقعد في اوضة لوحدي والقرار دا حصل بعد خناقة كبيرة بيني وبين اختي الي كانت ديما بتغتصب اغراضي وحجاتي وفساتيني منغير اذني، اكيد الموضوع دا بتعاني منه اغلب الاخوات، يمكن البعض يلاقي ان دا سبب غبي لكن بالنسبالي كان قوي .. ومنغير ما اطول عليكم مكنش في اوضة شاغرة في البيت غير اوضة جدتي الله يرحمها، وبعد محايلات كتيرة على بابا وافق اخيراً اني اقعد بأوضة جدتي على شرط ان الاوضة تفضل زي ما هيه منغير ما اغير فيها اي حاجة، طبعاً انا وافقت بالنهاية اثاث جدتي كان جديد ويعتبر انتيكة بسبب قدمه ،، شكله كان مميز خاصةً السرير "

المهم لميت هدومي واغراضي ونقلتها للاوضة، واقدر اقولكم اني ومن اول لحظة خطيت فيها العتبة حسيت بأحساس مش مريح خالص، مش بس كدة كنت كلما ارتب حاجة ارجع الاقيها واقعة او مرمية جنبي على الارض !"

انا حرفياً خلصت اليوم كله ارتب حجات سبق ورتبتها …كنت هتجنن بصراحة، بس بعد تعب خلصت، وبعد ما خلصت خرجت اتعشى وكنت مبسوطة وانا شايفة مفتاح الاوضة قدامي على السفرة كدة اقدر اخرج وانا مطمنة ان حجاتي بمأمن من ايدين الحرامية اختي !"

بعد العشا قمت دخلت المطبخ حطيت مفتاح الاوضة جنبي على حافة الخوض وبعدها ابتديت بغسل المواعين خلصتهم بسرعة وجيت عشان اخذ المفتاح، لقيته اختفى من مكانه دورت جنب الحوض وجواه وتحت منه، مكنش في اثر للمفتاح بالليلة دي كنت هتجنن وانا بسأل نفسي هو المفتاح راح فين، حتى كان مستبعد بالنسبالي ان حد يكون شاله لأنه محدش دخل المطبخ او قرب من الحوض غيري "

بعد ما دورت كتير يأست اني الاقي المفتاح فخرجت من المطبخ، ورحت نحية اوضتي وقبل ما اقرب لمحت المفتاح موجود في الباب !

جريت فتحت الاوضة واول ما عملت كدة حسيت بحد فات من جنبي بسرعة لدرجة ان كتفه خبط بكتفي ! 

كان مجرد احساس وبس، يعني لو كنت مغمض عينك وحصل الموضوع دا معاك مش هتستبعد ان دا فعلا شخص عدا من جنبك… 

انا مش هنكر اني خفت، لكني معرفتش ابين دا، وقلت هقرأ قرأن وكل حاجة هتبقى زي الفل "

دخلت الاوضة غيرت هدومي، وقعدت اذاكر شوية بعد ما تعبت رحت نحية السرير وانا هموت وانام، غمظت عيني وكنت هروح في النوم، لكني سمعت صوت جنبي، مكنتش قادرة افتح عيني او اتحرك، كانت بداية لحالة الجاثوم الصوت الي سمعته كان صوت جدي ؟

كان بيقولي ؟

_نايمة هنا ليه هااا، قومي جدتك هتجي بعد شوية ولو شافتك نايمة مكانهم هتعلقك من رقبتك ، قومي يلا بسرعة "

شوية والصوت بدء يتحول لصوت شخص تاني ونفس الجملة ترددت في وداني قومي اطلعي من هنا قبل ما جدتك تجي !

بعدها فتحت عيني وانا حاسة قلبي بيدق بسرعة وكأنه هيطلع من مكانه، استغفرت واستعذت بالله من الشيطان الرجيم وبعدها رجعت نمت ؟

وهنا رجعت لنفس الحالة الي كنت فيها، الفرق اني وقتها حسيت بأشخاص بالاوضة، مكنتش قادرة افتح عيني عشان اميز هما مين، وشوية لشوية سمعت شخصين بيتكلموا الشخصين دول كانوا جدي وجدتي، كانوا بيهزروا مع بعض زي العادة شوية، وفي حد منهم قرب نحية وداني وهو بيقول ؟

_الليلة دي مسموح ليكي تنامي هنا، بس لو نمتي بكرة هزعل منك، اوعي تنسي تحذيري دا "

…..

صحيت الصبح رحت المدرسة ونسيت او تناسيت تفاصيل الليله الي فاتت، ولما رجعت من المدرسه وفتحت اوضتي ودخلتها، لقيت هدومي وكل حجاتي ملمومة ومتكومة قدام باب الاوضة من جوى "

مكنتش فاهمة ازاي حصل دا، مع العلم ان الاوضة كانت مقفولة والمفتاح كان معاية !

مش هقولك اني عاندت ونمت فيها، لا انا بصراحه خفت وفسرت ان دا تحذير من سكان الاوضة هما مش حابين وجودي فيها، ورجعت لاوضة الي بتشاركها انا والحرامية الصغيرة اختي، وقلت اشارك الاوضة مع اختي احسن ما اشاركها مع عفاريت… ورجعنا قفلنا الاوضة تاني… ولغاية يومنا دا اي حد يفكر ينام فيها تحصلوا بلاوي متلتلة !

اتمنى تجربتي دي تكون نالت رضاكم وكمان رعبتكم، والسلام عليكم ورحمة الله وبركاته 

تمت 

قصة حقيقيه مذاعه #بقلم_ريتا_سليمان