انا عثمان من قرية "خيبتها" في محافظة الدقهليه
في ليله من ليالي سنيني الغبرة قررت امي العقل المدبر لحياتي وايامي السودة اني اتجوز !
برغم اني عاطل اساسا ومش قادر اتحمل مسؤولية نفسي،
لكن كانت بتلح عليا اني اتجوز بنت المعلم حمدان كبير الجزارين عندنا في البلد ، يهديكي يرضيكي ازاي هفتح بيت وهي ابداً هتجوز يعني هتجوز واني مشيلش هم حاجه
وهي هتتحمل المصاريف وهتبعتلنا اكلنا وشربنا كل يوم لحد ماربنا يفرجها عليا، وبعد تحريات هولمزية مني ، عرفت انها عايزه تجوزني عشان هي كمان تتجوز
يعني جوازه لمصلحتها وأن العروسة تبقى بنت الراجل اللي هتجوزني بنته، المعلم حمدان على سن ورمح ،
هي تتجوز الراجل وانه اتجوز بنته واظن كده التقسيمة حلوة ، بصراحه معارضتش كتير بالعكس كنت فرحان اني هتجوز في السن الصغير ده بس المشكله ان انا ٢٠ سنة والعروسة عندها ٢٩ سنه ، يعني مفكرش معاها اني اسيطر وارسم شوية الرجولة بتوعي قدامها ، لكن ماعلينا المهم ادخل عليها..
يوم دخلتي كان موافق يوم فرح امي على المعلم حمدان احنا الاتنين دخلتنا في يوم واحد ، ومعرفش ليه بس قولت ماشي وماله ميضرش طالما امي شايفه كده يبقى هو كده ، وفي اليوم الموعود ده كنت صاحي بدري ، وبسمة والتفائل هتاكل من وشي حتة ومنتعش باحساس جميل اني عريس ، وان اللي بسمعه وبشوفه في الافلام إياها هيبقى عملي وبين ايديا خلال ساعات ،
قايم من النوم بدندن وبغني واخر مزاج وروقان ، وبحضر الفطار لامي ست البنات ماهي عروسه بقى هي كمان ، وبتناديني عشان اشهل شوية عشان عيزاني في موضوع مهم بروحلها بصنية الفطار وبحطها ع الطبلية وبقعد في ريحها وبقولها
- خير ياعروسة ايه الموضوع ،اديني جتلك اهو
= عثمان انا معتمده عليك اوعى تزعل بنت حمدان ، ده روحه فيها ياحبة عيني
- دي في قلبي وفي رموش وحواجب وعين اللي جابوني ، ماكفاية توصيات ياما عرفت خلاص ان اللي هعمله فيها هيتعمل فيكي متخافيش
= استحملها ياحبيبي وبلاش تتخامق معاها
- اتخانق ايه بس يافاطمة ، دنا ههريها احضان وبوس وحاجات تانيه ياما اصبري عليا
= ياواد اختشي م اللي بتقوله ده مستعجل على ايه ، اسمعني بس
- قولي ياقمر قولي ياعروسة ياعسلية
= البت سماح مراتك عندها مشكله بسيطه
- دي لو بتنقط مشاكل وعيوب على قلبي زي العسل قال بسيطه قال ولا يهمك ادخل عليها بس وهنبقى زي الفل ان شاء الله
= يخربيت الدخله اللي واكله عقلك ياواد افهمني متتعبش قلبي
- طب قولي سمعك بس خدي حتة الفجل دي من ايدي يالا ياحلوة افتحي بوقك يامسكره انتي ، والله انا فخور بيكي ياما ، ام بتجوز ابنها وبتجوز نفسها في يوم واحد
= انت مالك مسروع كده ليه ع الجواز ماخلاص هتتنيل تدخل النهارده بس اسمع الاول ياحمار
- حمار طالعه من بوقك كريم كراميل والله، قولي ياما ايه المشكله خير
= سماح ..صوتها بيعلى شويه
- ياستي ولو ضربتني قلمان متخديش في بالك دي هتبقى في مقام اختي الكبيرة برضو ، وكلنا صوتنا بيعلى عادي ولما ادخل عليها هتتحول قطة صيامي وهتتمسح فيا
= ياابن الكلب هقوم اديك على دماغك اسمع يازفت
- حاضر ياست الستات تامريني عيزاني اعمل ايه
= هي بقى لما بتعلي صوتها هتلاقيه بيخشن كده زي صوت الرجاله عشان ايه بقى
- ايوه فاهم مسترجله يعني وماله ياستي ادينا هنحمي بعض من الناس الرمم اللي حوالينا
= مراتك ملبوسه ياعثمان فهمت ؟!
- عليها قواضي يعني ؟ وماله كلنا علينا قواضي
= قواضي ايه بقولك ملبوسة التانيه دي المتلبسة
- ايوه يعني ايه ملبوسه دي
= يعني حاجه لابساها
- ياما انا هتجوز سماح ولا هتجوز براند اديداس يعني ايه ملبوسة
= يعني عليها جن عليها عفريت وبيحصلها صرع وبتصوت بس مابتاذيش حد متخافش
- مين ياما اللي عليها جن وصرع مين قوليلي
= يوه ، ماقولتلك سماح
- سماح مين ؟
= اللي دخلتك عليها النهاردة ياعين امك
- بطلي هزار ، شوفتي بقى اديني بتشل اهو ، في ام تشل ابنها يوم فرحه
= ياحبيبي متخافش والله مبتاذي حد ابوها مأكدلي ع الكلام
- انتي عبيطه ؟، قومي ياما من جنبي بدل ماصوت والم عليكي الناس
= بتقول لامك عبيطه ياعثمان اخص ع البطن اللى شيلتك
- ياما بقولك ايه ، متهزريش معايا عشان انا جتتي مش خالصه لوحدها , سماح مالها ؟
= ايه في ايه مالها مفيهاش حاجه ، غير بس حكاية العفريت اللي عليها ده
- غير بس حكاية العفريت ؟ انتي هتجوزيني واحده بعفريتها؟ لالالا فكك من الجوازه دي خالص
= معلش ياضنايا عشان خاطر امك تتستر وتبقى في ضل راجل
- وهو انا قصرت في ايه راجل انا ياما ولا صوباع روچ
= ياحبيبي انا عايزه راجل يتقى ربنا فيا
- ويعني انا كنت بعبد السوست ، كلامك غريب ياما متعصبنيش
= يرضيك امك يميل بختها بعد ماضيعت عمري عليك هو انا ماليش حظ في الدنيا خالص
- متعيطيش بس واهدي ، ماهو برضو انتي بتقولي كلام ميدخلش العقل عيزاني اتجوز ملبوسة
= هتخف وهتبقى كويسه والله
- ياما دي ملبوسه مش عندها دور برد ، واستني افكرك بحاجه عني حاكم احنا بقالنا كتير مقعدناش سوا
= خير
- فاكره لما كان بيبقى في فار في البيت كنت بعمل ايه
= كنت بتصرخ وتتنطط وتنادي عليا عشان اموته
- ماهو انا بقى نفس ذات الشخص التافه ده ماتغيرتيش تقومي تجوزيني للعفاريت ياوليه
= خلاص يابني انت حر
- ربنا يزيدك من نعمة العقل كمان وكمان
= الحقني بس بكوباية مايه بسكر ياعثمان شكلي هموت خلاص
- ياساتر يارب فيكي ايه بس مانتي كنتي كويسه
= قلبي تعبني ومش قادره اخد نفسي خلي بالك من نفسك لو جرالي حاجه
- كل ده عشان تتجوزي ؟ ياما مش كده عيب ، سيبتي ايه لهيفاء وهبي
= الفراخ امانه في رقبتك راعيهم واكلهم متنساش
- فراخ ايه خلينا فيكي خلاص ياستي هنجوزك حاضر فوقي بقى
= يعني انا هتجوز النهارده ولا هيميل بختى واموت من القهره
- انا مش عارف اقولك ايه الصراحه يعني عشان عايزه تحطي احمر واخضر تلبسيني انا في الحكاية السودة دي شوفيلي لون تاني طيب
= ياواد ياعبيط ده البيت لهطة قشطه مش انت شوفتها قبل كدا
- هي ان جيتي للحق مزة تتاكل اكل ، بس تغور بعفريتها انا جبان ياما ميغيركيش ان طلعلي شنب صغير انا هشيله خلاص
= متخافش
- ايوه حاضر شكرا، انا اطمنت
= لاهو انت بجد بتخاف من العفاريت ياخايب؟
- مالك بتكلمي عنهم كانهم كورال روسي ، دول عفاريت وانا كنت بتنطط عشان فار
= اسمع بقى ماهو ياما تدخل عليها النهارده ونتمم الجوازه دي يامالكش ام وتشوفلك بيت تاني
- انتي بتهدديني وفكراني بالطريقة دي هقبل الجوازه
= ومالكش ميراث من ارض ابوك عندي
- ياما انا مبيتلويش دراعي
= خلاص اتفضل اطلع بره
- ماهو برضو العفاريت دي مش حلوه ياما افهميني مبيهزروش
= قولتلك مش هتاذيك لما تصرخ ولا تهيج سيبها واخرج
- لاحول ولا قوة الا بالله كان مالها الافلام بس
= افلام ايه ؟ قوم يالا حضر روحك للدخلة قوم فذ
- طب هتباتي معايا النهارده وابات انا معاكي بكره وكل يوم نبدل ، مره عندي ومره عندك
= لا مينفعش ماهو حمدان مبيحبش رجاله غرب تدخل البيت
- غرب ايه انتي اتبريتي مني ؟
= لا قصدي يعني مبيحبش رجاله غيره في البيت
- وليه بقى حمدان بتاعك ده ميصارحنيش من
الاول ان بنته ملبوسه ويغفلنا انا وانتي الراجل ده مينفعش اسمعي مني
= لا بالعكس الراجل عداه العيب وقالي كل حاجه ، وانا اللي خبيت عليك لحد مايجي الوقت المناسب
- حسبي الله ونعم الوكيل ، هقول ايه غير كده
= قوم يالا ياعريس ظبط حالك عشان تفرح وتتهنا النهارده
- انتي ياست انتي مستفزه ، اسكتي خالص وسيبيني في حالي
بتمر الساعات وبينتهي الفرح السوكيتي عشان امي تدخل بيتها مع عريسها وان ادخل بيتي مع الملبوسه ..
ورجل بتقدم والرجل التانيه بتأخر فدان ياترى ايه هيحصلك الليلادي ياعثمان والله كنت شاب زي الورد ، لولا العيبه لكنت اجري واسيب امي والعروسه والبلد باللي فيها بس هروح فين واجي منين ، الستر من عندك يارب
بتدخل سماح قدامي للاوضة ، وانا حاجه بتشدني لورا اني مدخلش وبفضل واقف ع الباب براقبها ومستني اي حركة مش طبيعيه عشان اخد ديلي في سناني واجري ، لكن بلاقيها مكسوفه مني وبتقعد ع السرير وهي حاطه وشها في الارض والبنت ماشاءا الله قمر 14 وبصوت رقيق رومانتيكي بتقولي
- هتفضل واقف عندك
= اصل انا عايز اخرج نسيت اشتري سجاير
- بس انت مبتدخنش سجاير
= والله ؟ ايوه صح بس قولت اجرب النهارده
- لا سيبك من السجاير وتعالي جنبي
= حاضر ان شاء الله هاجي بس نامي انتي الليلادي والصبح هجيلك تكوني فايقه كده
- انت فيك حاجه ؟
= لا انا كويس المهم انتي
وفجأه وشها بيقلب وعنيها بتبرق وصوتها بيبقى غريب وضخم كده وبتقولي
- تعالى جنبي
= سماح استهدي بالله كده اللهم احفظنا يارب اهدي ياماما وهجيلك حاضر
- مش هتدخل عليا ؟
= لا العفو انا اقدر اعمل فيكي حاجه كده، ده انتي امانه في رقبتي ادخلي انتي عليا لو عايزه
- بقولك تعااالي
وبتبدأ سماح تصرخ بصوتها الغريب وانا بقيت فص ملح وداب معرفش ازاي وصلت عند بيت امي في حوالي ١٣ ثانيه وربع
وفضلت اخبط ع الباب وفتحلي المعلم حمدان الله يحرقه هو وبنته في ساعه واحده قام بصلي وقالي
- انت سايب عروستك وجاي ليه السعادي
= ماهو انا يامعلم جي عشان عروستي برضو بس دخلني الله يستر عرضك
- في ايه بنتي جرالها حاجه انطق ؟
= جرالها من مين ؟ لا بنتك كويسه وزي البغل انا اللي جرالي
- جرالك ايه ياخويا اخلص وقول ؟
= لو سمحت انا عايز امي اندهالي من جوه
- اه فهمت انت طلعت كروديا النهارده ؟
= ايه كروديا دي ؟ انت بس ناديلي امي وكلنا هنبقى كويسين ان شاء الله
- تعالي يام المحروس شوفي ابنك الكروديا عايزك في ايه
* الله ؟ انت جاي ليه ياعثمان وسايب مراتك
= ماهو بيني وبينك كده ياتطلقيني ياهفضل الف ادعى عليكي عند كل الاوليا
* لم لسانك وقولي في ايه مش كفايه بوظت ليلتنا قول عايز ايه بقى خلصني
= بوظت ليلتكوا ؟ اعراض الانحراف ابتدت تزيد عندك ياما انتي مبقتيش طبيعية
* ماتنطق يامتربي قول في ايه
= البت سماح اتحولت عفريت ده كل الحكايه اعمل ايه في الجوازة المطينة دي دليني ؟
* يابني مش هتأذيك ويالا امشي بقى لحمدان ياخد باله ويقلب الدنيا علينا
= فيكي ايه قوليلي انتي مستنيه تسمعي خبري عشان دخلتك تتم على خير
* اختشي ياواد وامشي ، ياخلفة الشوم والندامه
=كان يوم اسود يوم ماخلفتيني وشوفيلي حل دلوقتي عشان انا شكلي عملتها على روحي ، يمين بالله ماهروحلها
* خلاص براحتك يالا بالأذن انا هقفل الباب
= بتطرديني ياما اخص عليكي
* روح بيتك احسن ، يالا بالسلامة
وبتقفل الباب وبتسبني مش عارف اروح فين ولا اعمل ايه وبقيت ماشي في الشارع بكلم نفسي وبضرب كف على كف من اللي بيجرالي ، تروح فين ياعثمان تروح فين يابو العثايث ، لحد ما جه في بالي ان العفاريت بتمشي الفجر عشان تنام وان ده الوقت المناسب اللي اروح فيه البيت وتكون هي كمان اتخمدت وابقى ضربت عصفورين بحجر ، بفضل ماشي في الشوارع وبتعدي ساعه بمنتهى الملل وبقابل في وشي صاحبي همام ، بطير من السعادة اني قابلت حد اعرفه صاحي وبجري عليه وبحضنه وببوس فيه وهو مستغرب وعمال يقولي مالك ياجدع فيك ايه ،
فرد وبقوله :
- وحشتني ياهمام وحشتني والله
= وحشتك ازاي انا كنت لسه عندك من ٣ ساعات
- بتوحشني كل مابتبعد ياحبيبي
= هو الجواز قلبك نجاة الصغيره ليه كده
- قول يارب ميقلبنيش ابلة فضيلة
= انت بس ايه اللي منزلك السعادي المفروض تكون مع عروستك
- لا دي تقاليد مش صح ولازم نغيرها
= تقاليد ايه بس النهارده دخلتك انت فاهم ولا انت كروديا ؟
- ايه حكاية كروديا اللي منتشرة في البلد دي ، ياسيدي انا فاهم بس حبيت امشي رجلي شوية
= طب يالا روح على بيتك كفايه كده
- طب ماتيجي نبات سوا
= ياراجل عيب عليك ، هو في حد بيزور عريس في ليلة زي دي
- متسبنيش ياهمام
= قولي انت خايف كده ليه بس، يكونش اللي في دماغي
- وايه اللي في دماغك يابرم
= شكلك معرفتش تدبحلها القطة
- مش اللي في دماغك ياهمام انا كويس وزي الفل كل الحكاية اني متوتر شويه
= طب يالا روح على بيتك طوالي يالا بالسلامة
- ابقى اسأل عليا ياهمام بالله عليك
= ماحنا هنجيلك بعد اسبوع انا وناجي وعزيز ومتنزلش من بيتك قبل اسبوع
عربس بقى ياعم يابختك
- بختي ؟ امشي ياهمام ، امشي من وشي السعادي
بسيب همام وبروح لحد البيت وبفضل قاعد تحت البيت مستني اسمع ادان الفجر عشان اطلع وبنعس شوية وانا قاعد وبيصحيني صوت الادان اخيرا فبقوم وبتحرك عشان اطلع وبتسحب وانا بفتح باب الشقة وبدخل بشويش لحسن تصحى وبقرب من اوضتها اطمن اذا كانت نايمه ولا صاحيه، ويارب تكون ماتت، لكن مش بلاقيها في الاوضه وبقول في سري الف حمد وشكر ليك يارب شكلها اتخطفت ، لكن بسمع صوت قفل باب الشقة بالمفتاح برتعش من الخوف وببص ورايا لاقيتها واقفه عند الباب وشعرها منكوش ولابسه جلابيه بيضا قصيره زي افلام الرعب ، وبتقرب مني ومبرقالي وبدأت اعراض الشلل تنتشر في جسمي ، وشكلي بقيت اخرس مش عارف اصرخ وانادي حد ، هي بتقرب اكتر وانا روحي بتتسحب مني اكتر ، لحد ماوقفت قدامي ، وقالتلي
- كنت فين ؟
= .......
- بقولك كنت فييين؟
= كـ .. كن .. كنت مع همام صاحبي
- تعالي ورايا
= منا مبقتش بعرف امشي
لاقيتها بتشخط فيا وبتقولي تعالي ورايا وسبحان الله الحيوية دبت في جسمي والشلل راح ولاقتني بتحرك وراها
- اقلع هدومك
= انتي تامريني امر حاضر
- يالا عشان تدخل عليا
= امتى ؟
- دلوقتي
= مانا امي نسيت تصارحكوا اني ماليش في الحاجات دي
- حاجات ايه اللي ملكش فيها
= الحاجات اللي انتي عرفاها
- خش ع السرير
= حاضر
- افرد جسمك
= اهو ياست الناس انا من ايدك دي لايدك دي
- يالا نلعب
= يالا ايه ؟
- نلعــب
= اه وماله نلعب منلعبش ليه حاضر عايزني اعمل قوليلي
- ارفع رجليك
= ارفعها ازاي يعني عدم اللامواخذه
- متتعبنيش
= حاضر اهو ، حلو كده ياست الناس
- هجيب الساطور بتاعي ، واقطع صابع صابع
= لا بلاش اللعبه دي بالله عليكي ، تعالي نلعب استغمايه
- استغمايه ؟ يعني ايه ؟
= ينفع اتعدل واقوم اقولك
- قوم
= حاضر ، بصى ياستي انتي بتغمي عينيك وتقفي هنا كده وتديني ضهرك وانا هستخبى ولو لاقتيني تاني ابقى انا الخسران
- تستخبى ؟ انت عايز تستخبى منى
= خلاص استخبي انتي المهم حد مننا يغور من وش التاني
- لعبتي احلى نام يالا ع السرير ، اقولك هقطع رقبتك احسن
= لا مينفعش المفروض بتعذبيني زي اسرى الحرب وبعدها اقتليني
- غمض عينك احسنلك
= ابوس ايدك الله يخليكي وحقك على راسي لو مزعلك في حاجه تحبي اوطي على رجلك ابوسها ؟
وفجأه لاقيت سماح بتضحك بهستيريا بصوت عالي وعينيها بتنزل دموع من الضحك وقاعدت على السرير وشدتني من ايدي قعدتني جنبها وقالتلي
- انت صدقت اني ملبوسة
= امال انتي ايه ؟
- ده مقلب حلفت امك عليه تقولهولك ، عشان ادبحلك انا القطه
= مقلب ، انتوا بتعملوا فيا مقلب طب ليه ؟
- كنت عايزه الليله دي تفضل فاكرها متنسهاش
= يعني انتي مش ملبوسه ياسماح
- لا والله انا كويسه
= امال ايه الاصوات اللي طلعت منك دي خلتيني اجري في الشوارع زي اللي هربان من الحكومة
- عادي بعرف اقلد اصوات ولما لاقيتك جريت ملحقتش اوقفك وكنت مستنياك ترجع ومحضره نفسي ارعبك اكتر بس قولت اقفل الباب الاول لتهرب
= يعني مش ملبوسه ياسماح
- الله ، ماقولتلك لا ,
ها بقى تحب تقولي ايه في ليلة دخلتنا ميتنسيش
= انتي طالق
سلسلة عفاريت
الحكاية (1) ليلة ملبوسة
#سلسلة_عفاريت
#ليلة_ملبوسة
#بيتر_نيدفيد
#peter_nedved
تمت
تعليقات
إرسال تعليق