وعد الأبد

قصة. (حرب السلايف). . بقلم حسن الشرقاوي 

 بجد ياجماعه أنا زودتها إيه إلى أنا بعمله دا إيه الرعب الكوميدي دا هو في كدا والقصص 

أنا إسمي محمود عندي ٣٠سنه ليا أخ إسمه وليد أصغر مني بسنتين من قريه صغيره تابعه لمحافظة الشرقية أنا متجوز بقالي ٦سنين واخويا وليد بقاله حوالي سنتين....

عايشين في بيت عيله كل واحد مننا ليه شقه خاصه بيه

 لكن في عرف الأرياف إنه بيت عيله بحكم إن الأهل في الدور الأول وطبعاً كلكم عارفين الكلام دا

لما وليد أخويا اتجوز كنا بناكل تحت مع أهلنا ومقسمين إن كل واحده ليها يوم تعمل فيه الأكل للكل وبعض الأعمال في الدور الأول إلى بيعيش فيه أبويا وأمي خصوصاً إنه مالناش اخوات بنات....

كانت الدنيا أول كام شهر زي الفل وكل شيء طبيعي بنروح شغلنا أنا ووليد وزي ما قسمنا بينهم كانت الدنيا ماشيه تمام

كل واحده بتعمل إلى ليها وإلى عليها 

لحد مابدأت المأساه

مشاكل بين زوجتي وزوجته على كل حاجه الأمر وبدون الغوص في تفاصيل انتم أكيد عارفينها وعارفين طبيعة المشاكل بتاعت السلايف بتكون عامله إزاي ومدي تفاهتها 

إلى خلانا نشيل دا من دا يرتاح دا عن دا بالبلدي وإنعزلنا وكل واحد قعد لوحده في شقته منعا للمشاكل

 وكان أبويا وأمي متقبلين دا علشان يريحونا من المشاكل إلى كل يوم بتزيد 

لكن الأمر ماوقفش عند كدا حتى بعد ما تعزلنا تطور الأمر لما هو أبعد من ذالك

مشاكل كل يوم وخناقات على أتفه الأسباب وغيره وفي بعض الأحيان بتوصل للضرب

بقينا سيره ومثل لكل لسان بين أهل القريه كلها ماكانش بيعدي يوم من غير مشاكل وخناق بينهم 

عملنا كل حاجه غضوبات وغضبناهم ضرب وضربناهم قعدات للصلح وقعدنا لعل وعسي الدنيا تتظبط لكن كل المحاولات فشلت

لحد ما اعتدنا على الموضوع وشوفنا إننا نستحمل ونتجاهل لأن فيه ولاد ماينفعش يبقا في طلاق علشان خاطرهم 

ظل الخصام وافتعال المشاكل هو السائد بينهم ..

لكن بالرغم من كل دا أنا واخويا عمرنا ما زعلنا من بعض أو اتخاصمنا كنا متربيين تربيه كويسه وبنحب بعض لكن النصيب إلي وقعنا في اتنين عقلهم صغير ومصابين بمرض عند سلايف كتير مرض الغيره وعدم تقبلهم لبعض 

لكن كان زايد عندنا اووي 

وكمان مشاكلهم وترقبهم لبعض اتسبب في إهمال كبير لينا كحقوق زوجيه لدرجة إن مراتي بقت حرفياً ناقص تلبس هدومي ونسيت إنها أنثي ....بقلم حسن الشرقاوي 

وإلي زاد الأمر بشاعه إنهم بدأوا يمشوا ورا الشيوخ والأعمال والدجل إلى كان منتشر اووي عندنا في الأرياف بقوا يروحوا للدجالين يضحكوا عليهم وياخدوا منهم فلوس لدرجة إن الموضوع أصابهم بهلاوس 

...............

وفي يوم قابلت واحد صاحبي إسمه حسن الشرقاوي كانت دماغه حلوه شويتين 

قال...مالك ياحوده زعلان ليه

قلت..يعني إنت مش عارف ياحسن مابتسمعش عن الحرب إلى عندنا في البيت

ضحك وقال...السلايف .....دي ظاهره يابني في كل البيوت دول زي مايكونوا مولودين فوق روس بعض

قلت..طيب والحل ياصاحبي مافيش حل يعني

سكت شويه وقال..مين قال إنه مافيش حل

الطريقه ١٢٠

قلت.. إيه بتقول اييه ياحسن

قال...الطريقه ١٢٠هي الحل

قلت..وايه هي الطريقه ١٢٠دي

قال...مش بتقول هما مشيوا ورا الشيوخ والأعمال والدجل

قلت.. آه

قال...طييييب هنلاعبهم بالدجل يامعلم وهساعدك خدمه مني ليك

وحكالي على كل التفاصيل إلى هانعملها

قلت بعد تفكير..وتفتكر هاتجيب نتيجه معاهم

قال...لو حبكناها صح وعملت إنت ووليد إلى قلتلك عليه كويس هاتجيب وادينا بنجرب مش هانخسر حاجه

قلت...نجرررب

مشيت وسيبت حسن صاحبي

وروحت وكالعاده لقيتهم عاملين مشكله

ناديت على وليد وحكيتله على الطريقه ١٢٠علشان 

علشان يقولي.. أما فكره بنت أبالسه بصحيح

قلت..طيب يالاااااا يابطل نبدأ

في الليله دي وليد وقع ومثل أنه تعبان كان بيعرف يمثل كويس

المهم عمل حركات كأنه ملبوس بجن فضل يبرق بعنيه جامد ويتشنج وما إلى ذلك

وكرر الأمر دا كتيير لحد ما الكل صدق إنه ملبوس 

طبعاً كان جزء من الخطه إني هاجيبله شيخ والتاني والتالت 

الفكره إننا كنا عاوزين كل الشيوخ إلى بنجيبها نظهر ضعفهم وعدم تمكنهم من علاج وليد إلى بدأ يزود العيار ويعمل حركات غريبه أنا كنت ببقا واقف أضحك في سري عليها

المهم المشاكل توقفت قليلاً وانشغلوا شويه في تعب وليد وطبعاً كل واحده كانت ماشيه مع دجال بيعملها الأعمال جابته وبردو مافيش فايده ماحدش عارف يعالجه لأنه مافيش فيه حاجه أصلا 😂 ودا كان جزء من الخطه...

بقلم حسن الشرقاوي 

لحد ما في ليله وبعد إتقانه للدور وقفت

 وقلت ....لاااا أنا مش هاسكت وطلعت التليفون كلمت حسن إلى كان بيساعدنا وفي مكالمه وهميه

قلتله... أنا عاااوز شيخ يكون متمكن وكويس أخويا بيضيع جيبناله شيوخ مصر كلها ومش عارفين يعملوا ليه حاجه

كان واقف مراتي ومراته وسامعين الكلام....

انتهت المكالمه على إنه يعرف شيخ مغربي كبير أوي هو إلى هيعالج وليد أخويا

وقالي إنه هايكلمه وابقي أجيب عربيه وأروح اخده

كانت الدنيا تمام وكل حاجه ماشيه زي الفل

بعد يومين رحت أجيب الشيخ

إلى هو حسن الشرقاوي صاحبي لبس لبس دجل وشعوذه 

وظبط الأداء

قلت..يخربيتك دا أنا ما عرفتكش

قال.. اوومال.... لازم نظبط الأداء إحنا بنلعب المهم ماحدش فيكم يغلط

قلت...طيب مش عارف تقول مصري اشمعنا مغربي يعني إنت بتعرف تتكلم مغربي

ضحك وقال..وصيني كمااان لو تحب... المغاربه مشهورين بالحاجات دي يامعلم وماتقلقش أنا ليا ناس صحابي مغاربه لقطت منهم كام كلمه كدا برقا ومرقا وهقا وشقا يعنى بص هانحط القاف والألف ويبقا مغربي أصلي 😂

المهم روحنا للبيت التفينا كلنا حوالين وليد نشوف الشيخ المغربي الكبييير وهو بيعالجه

كان بيعمل حاجات متفقين عليها مسبقاً وكأن وليد ملبوس فعلاً حضر الجن إلى المفروض لابسه وفضل يتكلم معاه كان وليد متخن صوته وبيرد كأنه هو الجن

أنا كنت واقف ميت على روحي من الضحك وهما طبعاً واقفين مرعوبين

وبجد حسن دا طلع داهيه اوهمهم فعلاً إن مافيش في العالم زيه

وخلص وقال إن الدنيا تمام وخلاص وليد بقا زي الفل وقعد شويه قدامهم يمجد في نفسه وفي إمكانياته

وهو ماشي كانت كل واحده فيهم واخده رقمه😂

وكان دا المطلوب علشان تكمل الفكره وتنجح

كل واحده كلمت حسن إلى هو الشيخ على حده وطلبت منه إنه يعمل عمل للتانيه ....

وافق حسن وقالهم علشان العمل يكون مفعوله جامد وشديد هايكون في طلبات للجن ...قال ليهم إنه هايكلف جن من إلى بيسخرهم للأعمال لخدمة العمل إلى هايعمله وفهم كل واحده إنها لازم تنفذ طلباته وحذرهم من عدم تنفيذ الطلبات

 وطبعاً لأن كل واحده بتكره التانيه وبقا تفكيرهم كله في الأعمال ماترددوش في الموافقه

وهنا دورنا بقا في سبك الموضوع عليهم أخونا حسن ادا كل واحد فينا صب على شكل كانز عارفينه طبعاً إلى انتشر في فتره من الفترات دا بين المراهقين إلى بيصدر أغاني وبيشتغل بالبيليتوث

المهم إحنا هناخد الصب دا وهانعمل فجوه في الحيطه جمب السرير إلى كل واحده بتنام عليه ونحطه مابين الطوب الاحمر المخرم وبعد كدا نرجع الحيطه زي ما كانت بالظبط كأن مافيش حاجه 

وعلشان نعمل كدا غضبناهم وبعتناهم لبيت اهلهم أسبوع

حطينا الصب في الحيطه وظبطنا الدنيا تاني من محاره ودهان كان الحيطه ماحصلش فيها حاجه

الصب دا المفروض إنه هايكون الجن إلى هايكلفه الشيخ إنه يطلب منهم الطلبات إلى هاينفذوها

ودا إلى حصل فعلاً بعد أسبوع كل واحد فينا جاب مراته

إلى كانوا على أتصال بالشيخ إلى عرفهم أنه خلاص كلف الجن وعلشان العمل يكون تأثيره جامد لازم ينفذوا طلباته لما يكلمهم وقالهم مايخافوش مش هايأذيهم لما هايكلمهم وطول ما هما بينفذوا الطلبات 

وطبعاً ظبطنا كل حاجه وحسن كان بيبعت لينا تسجيلات كأنه هو الجن

وفي ليله شغلت الصب قبل ماتدخل الأوضه علشان ماتعرفش إنه صب 

وشغلت التسجيل وأنا نايم

علشان تتفزع وتقولى...محموود إنت سامع حاجه

قلت..حاجه إيه أنا مش سامع حاجه

علشان يرد...ماحدش هايسمعني غيرك ماتخافيش أنا جن العمل اياكي تعرفي حد هاطلب منك طلبات تنفذيها من غير كلام ولو مانفذتيش هالبسك

المهم أنا لقيتها بتفرك وبتقرب بودنها للحيطه لأن الصوت أنا كنت مهديه خالص علشان مايبنش إنه صب 

وقلت..لااا دي بقت عيشه زفت الله يخربيت الشيوخ والعفاريت إلى كله دماغك وجننوكي وسيبتها وطلعت

علشان يدور بينها وبين الجن حوار

من بينه قال...قومي البسي قميص حلو وروحي لجوزك

قالت اييه..قميص دا أنا بقالي عشر سنين مالبستش قميص

قال...بقلك قووومي ولا عايزاني ألبسك

خافت وقالت..لاااا ألبسله يا خويا ألبسله ماتزعلش نفسك بس هاتلبس سلفتي امتا

قال..لما تعملي إلى بقلك عليه إلبسي قميص ورأقصيله يالا

قالت...لاااا كله إلا كدااا ارقصله لاااا اتكسف

عليت الصوت.. قال...تتكسفي من جووزك طيب أنا طالع من الحيطه ألبسك إنتي وافرح فيكي سلفتك إلى بترقص لجوزها دلوقتي

قالت...هي بتعمل كدا دلوقتي

قال... آه وأنا شايفهم اهووو

قالت...طيب خلاص هارقص

قال...يالا قومي ولو ماعملتيش إلى قلتلك عليه انتى عارفه هاعمل إيه

قامت ولقيتها جايه تناديني طبعاً عملت من بنها واتعززت شويه اتحيلت عليا إني أرجع للاوضه تاني وبعد محايله رجعت فتحت الدولاب ولبست القميص وشغلت التليفون ورقصت

قال إلى ورا الحيطه..بننننفس ارقصي وادلعي لجووزك

 طبعاً كانت تسجيلات

وكانت أول ليله من عشرين سنه أشوف فيها مراتي إلى كانت حرفياً بدأت تلبس هدومي كانت ليله حلوه فعلاً بقالي كتير ماعيشتهاش 

وكذلك دا إلى حصل مع أخويا وليد

وبدأ الاتنين في تنفيذ كل طلبات الصب.. قصدي الجن إلى ورا الحيطه انشغلوا بيه وبطلباته إلى كانت كلها في صالحنا بدأت المشاكل تقل تدريجياً لأن الطلبات كانت بتدرج مع الوقت

رجعت علاقتهم بينا كويسه

وإن كانوا علي خصام لسه إلا إن كل واحده بقت معتمده على الصب إلى بيكلمها وأصبح وسواس قهري ليها وانعدمت المشاكل تماما تماماً.... ااااااه 

ونجحت الخطه ١٢٠وبقينا أخيرا والحمد لله عايشين بدون مشاكل والبركه في الجن إلى ورا الحيطه ربنا يستر بقا ومايعرفوش تبقا نصيييبه

انتهت..... تلت حاجات هاتعملهم بعد ماتخلص قراءه

لايك

كومنت برأيك

تالت حاجه ودي الأهم ياجماعه أنا بطلبها وفي ناس كتير بتنسى تعملها

المتابعه بعد ماتخلص اطلع فوق أعمل متابعه لصفحتي الشخصيه لدعمي وتقوية الحساب من الغلق

ماتنسوش المتابعه ليا أعلى الصفحة على إيدك الشمال

ولو وصلت لهنا لو ليكي سلفه حابه تهزري معاها منشني ليها

وفي الأخير لو لقيتوا القصه في مكان تاني تبقا مسروقه مني زي قصص كتير

ولو حد هايخدها ياريت يقدر مجهودي ويسيب إسمي عليها

بحبكم كاتبكم حسن الشرقاوي ♥️