وعد الأبد

الجزء الثاني 

                      🦉((((لعنه القبور))))🦉

 بعد ما جري صميده علي العزا والجثه هاتتحط في النعش والناس واقفه والمشهد رهيب. وقف العمده مع عسران يطيب بخاطره. ويقوله البقيه في حياتك. وسط الهيصه والحزن ده كله العمده سمع صوت صميده جاي بيصرخ من بعيد وبيقول الحقنا يا عمده الحقنا يا عمده 

_فيه ايه يا غفير الزفت انت 

_قبل ما يتكلم صميده العمده شاور لشيخ الغفر وقاله خد المخبول ده وحطه في السلاحليك لما ارجع وافهم ماله ده كمان 

_استني يا عمده استني عايز اقولك علي حاجه خليفه مااااات 

الكل كان واقف مذهول من اللي بيسمعه 

ازاي خليفه مات وانت كنت فين 

**فلاااااااااش باااااك **

في الترب كان صميدة وخليفه قاعدين ومعاهم السلاح بتاعهم ومدين وشهم للمقام اللي  في نص الترب مقام سيدي العجمي اللي كان فاصل بين الترب القديمه والجديده  

سمعوا صوت طوبتين وقعوا من المقام 

صميده يا زفت يا صميده 

فيه ايه يا خليفه ابوس ايدك متلبشسش جتتي انت ناسي احنا في وسط الميتين وكمان فيه جريمه قتل حصلت هنا يعني متلبسش جتتي 

انت سمعت اللي انا سمعته يا صميده 

سمعت ايه 

صوت حاجه بتتهبد علي الارض جوه المقام انا خايف قوي قوي يا صميده 

انت بترعبني ليه. النهار طلع والناس بقت ماذيه علي السكك اهي خايف من ايه 

طيب انت ليه مش مصدقني قوم تعالي معايا نبص علي المقام وانت هاتصدق كلامي 

تعالي خلي النهار ده. يعدي علي خير 

قام خليفه ولف من ناحيه وصميده لف من ناحيه تانيه   ولما صميده قرب من المكان اللي ورا المقام بتاع سيدي العجمي لقي صوت خليفه زي مايكون مكتوم وبينادي عليه 

صمييييده الحقني يا صميده 

اول ما صميده بص وشاف المنظر. جري وساب خليفه 

****************

اهل البلد واقفين بيبصوا علي العمده وشيخ البلد عسران والناس بدات تتكلم عن اللي حصل لخليفه وعمران ابن شيخ البلد. وفي وسط الناس واحد وقف وقال استنوا هنا احنا عايزين نعرف فيه ايه والناس اللي ماتت دي ماتت ازاي وايه اللي موتهم يا حضره العمده 

_انت عايز تعرف ايه يا مجاهد 

_بقولك احنا كلنا عايزين نعرف ايه اللي حصل والناس دي ماتت ليه وايه اللي في الترب 

_العمده وقف وعدل العبايه علي كتفه وبص لشيخ البلد وقال اسمعوا يابلد اللي هاقوله ده لازم تسمعوه كويس  قوي 

السلعوه ظهرت من تاني في البلد  وعشان انا خايف عليكم كل واحد يقفل عليه بابه من ادان المغرب ومايطلعش خالص فاهمين واللي هايطلع من داره مايكونش ماشي لوحده عشان السلعوه دي لو استفردت بواحد مابتسيبوش 

يلا بينا ندفن الميت بتاعنا ونشوف خليفه فين وجراله ايه 

**وصلوا الترب والناس واقفين وكل واحد معاه سلاحه ومجهزة عشان لو السلعوة طلعت يقتلوها 

خلصوا دفنه وقلبوا الترب علي خليفه اللي لقوا نصه الفوقاني مرمي قدام تربه قريبه من المقام وهو ميت وعنيه مفتحه علي الاخر  وماسك البندقيه بتاعته في ايده 

والنص التاني مرمي بعيد قوي عنه وعليه خربشه كتير 

الناس وقفت مستغربه والعمده قال انا قلتلكم ان السلعوه دي خطره قوي ولازم تاخدوا بالكم من عيالكم وماتخرجوش من بيوتكم مهما حصل 

وهو معدي علي المقام لقي فيه حته مهدوده منه وقف وبص ليها وخاف يقول للغفر حد يقف هنا حراسه علي المقام ماهو خليفه لسه متقطع قدامهم 

************

يا غفير هات صميده من السلاحليك  

اهو يا با العمده صميده اهو 

 انت شوفت ايه يا صميده في الترب 

صميده وقف يبص للعمده وخايف بتكلم 

انطق يابني شوفت ايه 

انا خايف يابا العمده خايف قوي 

متخافش يا صميده قولي انت شوفت ايه 

شوفت خيالين سووود قوي وبعد.كده رجليهم قلبت رجلين معيز وبقي ليهم قرون وشوفت واحد منهم ماسك ايدين خليفه بيشده منهم والتاني ماسك رجليه وبيشده منهم لعند ما اتقطع نصين  ده اللي شوفته 

كان علي جسمهم شعر يا صميده 

ايوة علي جسمهم شعر وعنيهم بتطلع نار  واول ما شوفتهم طلعت اجري 

طيب ماتتكلمش خالص عن اللي شوفته ولو حد سالك قول السلعوه فاهم السلعوه 

بس دي مش السلعوه ياعمده انا عارف السلعوه كويس

انت سمعت انا قلتلك ايه يلا روح علي دارك واقفل الباب عليك انت وعيالك وماتخرجش منها ولا تيجي هنا الا لما ابعتلك 

**************

البقيه في حياتك يا عسران 

حياتك الباقيه يا عمده 

بعد ما تخلص العزا عايزك في كلمتين 

تحت امرك  

الي كنا خايفين منه يا عسران حصل اهو ومش عارف هانتصرف ازاي 

انا قلتلك من الاول  انهم مش هايسيبوا تارهم معانا انت عارف اننا فصلنا الترب بتاعتنا عن الترب القديمه والموضوع ده اتنسي من سنين السنين 

الله يرحمك يا شيخ منصور لو كان عايش مكنش ده كله جرالنا  الله يرحمك 

انت هاتعمل ايه يا عمده 

هاخلي كل واحد يفضل في داره لعند ما الهوجه دي تعدي وتخلص 

انت شايف انها هاتخلص يا عمده ************************

اخيرا الاجازة جت وهارتاح من المذاكره كلها 

اه انت هاترتاح ما انت عارف انك ناجح يا محمود. انما يا عيني علي بختنا احنا الاسود اللي مابنعدي سنه الا ومعانا مادتين تلاته   انت مش كنت بتقول انك من الارياف يا محمود 

ايوة من الارياف بتسال ليه 

بسال يعني لو تخرجنا من القرف ده وتودينا عندكم في الارياف نقعد يومين تلاته نغير جو اناسمعت ان جو الارياف ده بيسحر يا جدع 

ايوة بس انا بقالي سنين ما روحتش البلد خالص ومش عارف حد هناك 

يعني انت لو رجعت هايطردوك يا محمود 

لا مش القصد انا بقول ان انا مازورتش البلد من يجي عشرين سنه ومعرفش حد هايفتكرني ولا لا 

ياعم جرب ما يمكن يفتكروك ولا انت بخيل 

انا مش بخيل وعشان تصدق انا هاسافر النهارده ياسيدي 

ايووووة بقي رجلي علي رجلك يا محمود 

**************

يا اهالي البلد  كل واحد يدخل داره ويقفل عليه باب بيته وما يطلعش من الدار خالص 

يا اهالي البلد كل واحد يخلص شغله في غيطه ويقفل بابه عليه ويرجع قبل ادان المغرب السلعوه في البلد واللي بتشوفه بتقتله كل واحد خايف علي نفسه وعياله يدخل داره ويسك بابه عليه 

  *******

محمود انت متاكد ان دي بلدكم 

ايوة هي علي ما افتكر الاسم اهو بلد ...... الواسطي 

 امال فين الناس مفيش حد ماشي خالص ولا بيتحرك 

مش عارف والله 

وعلي كده فاكر البيت ولا هاتتوه عنه 

لا متخافش تعالي معايا هو بعد الجامع ببيت واحد 

اهوووووو البيت اهو بس مقفول من سنين بعد جدي ما الله يرحمه مات 

وقف محمود وصحبه قدام الباب بس كان القفل قديم ومصدي وحاول يفتحه مابيفتحش جاب حجر وبقي يكسر في القفل عشان يفتح الدار 

__يا صميده انت يا راجل 

عايزة ايه يا شيخه انت كمان 

مش سامع اللي انا سمعاه 

سامعه ايه 

الخبط اللي برا ده 

اي والله فيه خبط جامد قوي يا بت 

ماتقوم تفز يا راجل وتشوف اللي بيخبط ده مين 

اتخمدي ونامي يمكن السلعوه 

نهار مطين بطين  السلعوه 

ايوة يمكن تكون هي السلعوه ولو فتحت الباب هاتنط تاكلني 

وانت ان شاء الله هاتفضل قاعد في الدار كده من غير اي شغلانه 

العمده قالي ارتاح في دارك 

ياراجل انا مرعوبه قوم شوف مين اللي بيخبط علي بابنا ده 

 مش هافتح 

كان محمود بينادي علي اقرب دار من داره عشان يسالهم لو عندهم لمبه جاز   ينور بيها 

يا اهل الله يا اهل الله 

قوم يا صميده فيه  حد بينادي علينا 

يووووة يا وليه.  هاقوووم اهو 

فتح الباب برااااحه ومعاه عصايه كبيره في ايده لقي اتنين افنديه واقفين قدام الباب  

ايوة يا افنديه ايتها خدمه 

انا ابقي محمود اللي جده منصور اللي بيتهم ده. كنت بستاذنك يعني  لو مفيهاش رخامه كنت عايز لمبه جاز للصبح 

انت بتقوووول مين 

بقولك محمود اللي جده الشيخ منصور 

طب ادخل ادخل 

فيه ايه 

ادخل بس انا هاقولك انت لازم تكون جعان 

لا الله يخليك اكلنا في الطريق   اهل البلد فين زمان كانوا بيسهروا للفجر 

زمان بقي يا سي لافندي 

طيب انا عايز لمبه الجاز 

والنبي ما هاتمشي انت هاتبات هنا انت وصاحبك للصبح 

لو عجبك الجزء الثاني اكتب تعليق 🙂❤️